.




بين نفْسي وٰ ذاتي | 2

الشبكة العنكبوتية و مواقع التواصل الاجتماعي و تطبيقات مختلفة ، كل شي واي شي بسهوله نوصله ونحصله من خلال هواتفنا الذكية. عالم الديجيتال عام كبير و واسع و عظيم، مفيد وخطير في نفس الوقت !!

.
.

امر طبيعي الشي يكون ايجابي عند احسان استخدامه وسلبي عند استخدامه بطريقة سيئة...! 

.
.



 تطرقت سابقاً لموضوع الحب (الحرام) و لسذاجة الفتيات بأن الحب عالم آخر ، ما تصحى منه الا يوم اييها كف يكسر ضروسها على اثره (( تستاهل مسودّة العين)) ،  الحلال بيّن والحرام بيّن وكله شي موضح في دينا و القران الكريم مرجعنا فـ ما في عذر ابداً، والبشر يمتازون عن سائر مخلوقات الله بوجود عقل مقعد التركيب عشان يستخدمونه و يفكرون و يفرّقون بين الصح من الغلط ،، ما بعور قلبي فالنهاية كلٍ ذنبه ع نفسه ومحد بيتحاسب مع حد ،، كلن نفسي نفسي ! واليهّال الحين احذق عن لكبار ما شاء الله كل شي يعرفونه.

.
.

تحرطمت/ واستنكرت سابقاً في تويتر عن هالموضوع ، وكل يوم احسني انصدم فالنّاس اكثر واكثر و في تفكيرهم اكثر و اكثر ، ما اذْكر في هاللحظه غير زميله تدعى "فيروز"  تكبرني سناً ، كانت دائماً ما تقول لي  "خلك في عالمك الوردي" ، كل ما استغرب من شي او موقف او تفكير او شي ، تضحك واتقول "لا تصحي خلك في عالمك الوردي احسن لك". ذكركِ الله بخير يا ام أحمد وعلا ذكرك في ملائه الأعلى بإذن الله.


.
.

السناب جات من اكثر البرنامج شهرةً هذه الايام، لدرجة انه صارت شخصيات تفوق الشخصيات الشهيره شهرةً و سموهم مشاهير التواصل الاجتماعي و صار تأثيرهم ع الشباب قوي، أحد هالمشاهير واللي اتابعه هو سعيد الرميثي (S_6) اكاونته في السناب جات، في احد فيديواته كان منزل استفتاء عن الزواج عن حب او الزواج التقليدي ، و بعدين حط استفتاء عن الزواج عن حب اذا كان عن حب كيف يكون ، انصدمت من النتايج انه اغلبيته من خلال التواصل الاجتماعي ! الناس جيه تفكيرها، من ضمن الوسائل اللي يسمونها عن حب ( انستقرام وتويتر) ، يحبون بعض و ياخذها. لا جد ارمس جد الحين، كيف؟!!! لو انا ريال بسم الله عليه مستحيل اخذ وحده مسولها فولو ع تويتر او انستقرام وما اعرفها ولا اعرف اهلها ، هل هي انس ام جان خخخ " استغفرالله".  امم كل شي جايز يعني مع تطور الوقت !! بس فعلاً انصدمت  هل فعلاً في ناس جيه؟ كيف الرجل يثق ف هالبنت، او البنت كيف تثق في هالرجل ، لدرجة انهم يعرسون ببعض وهم ما يعرفون بعض الا من خلال شاشة؟ ههههه الله يسعدهم و يتمملهم على خير. فالزواج التقليدي بعد يكون ما يعرفها بس الاهل، او قد يكون شايفنها مثلا و بغاها، هنيه انقول صح، لانه دخل من الباب ما لف وداااار، فـ لنفرض حبها ف تويتر او انستقرام او وت ايفر، اذا كان حبه صدقي "وانا ما اعرف كيف حبها اصلا هههه" المهم ما سار و رمسها او سوا علاقه حب وياها، لااا ، انا ارمس عن الحب الصدقي ، حبها بصدق، وخاف عليها و على نفسه من الإثم و ما رضى ابداً عليها وياها ع سنة الله ورسوله، هنيه ممكن اوكيه ما ادري خخخ.  على العموم، ما يهمنيه الله يحفظنا من شرور و تطور الزمان السلبي.
لكنّي فعلا ما اقدر ادخل الموضوع فـ مخي!


.
.

الخجل سمه من سمات الفتاه العربية ، واللي يفترض انه تتحلى به جميع الفتيات ، و يعد شعبه من شعب الايمان. و دائماً الفتاه لا تبادر، المبادرة تكون من الرجل ، يعني جنه قانون، الرجل صاحب المبادرات اما الفتاه مستحيييل او لحظه ما بقول مستحيل ولكن لا تستنكر عدم مبادرتها. تقدرون تقولون معادله او قانون او عاده او اي شي. انا فتاه جداً خجول، و مستحيل ابدر بشي في تعاملاتي مع زملاء العمل ((مع العلم انه ما عندنا رياييل واايد كمن واحد، المكان كله حريم و معروف عندنا فالعين انه وين انا اداوم يقولون (عند الحرمات) ههههه "الحمدلله")).  بيئة العمل جداً مختلفة. 
 اذا مريت و ما سلمت ع الشخص اللي شرحلك مثلا في احد الايام او اتعاملت وياه مره او اي شي ، يتمون ما ادري كيف. انزين انا ان ما سلمت او قلت شي ف شي طبيعي كوني بنت اما انته عادي، انا طبعي مستحيل حتى اعق السلام.  اذا خطفت وكانو رياييل، استحي، كنت اصلا من اشوف ضول حتى لو زلمات ، اتوهق هههه، أخجل فعلاً،  امسك تلفوني و اتصل بأي حد و ألتهي فيه لين اخطف، ابطيت اتبع هالطريقة لين اتجاوزت مرحلة الخجل " ما تجاوزت ولكنني اعتد ع الامر" ،، يعني يوم اخطف فالممر وهم في مكاتبهم اللي يطل ع الممر، ما اسلم، وما ارفع راسي امشي لين اوصل مكتبيه، ولكن اذا هم بادرو فـ ارد السلام ، وإن قالو كيف الحال ارد ، لكن اني اقولهم كيف الحال؟ ابد الابدين ما اقول هههه مب انه عيب ومب من شي بس انه خلاص ما ادري احس يالله ارد السلام و ع قد السؤال اجاوب، بشكل عام ابدا ما اتعامل مع الرياييل فالدوام، اصلا من بعد فترة التدريب خلاص الحمدلله، الا 2 شباب مصريين فـ قسمي، و اذكر من قريب يعني كملت سنتين، واحد منهم (بو آيـه) حليله، يقولي اتخطفين ولا اتسلمين؟ ههههه ع كثر ما نشّفت ريجه و هو يشرحليه و رفعت ضغطه و تعبته، الا اني يوم اخطف فوق و يكون ع مكتبه ما اخطف صوبه واسلم سيده مكتبيه. متى اسلم؟ يوم انزل القسم تحت يكونون قوم قسمي يالسين ف اسلم مره وحده سلام واحد خخخخ. كنت ابا اقوله انه البنت عادي ما تبدر، ما عليها لوم هههه، ما ادري ، بس خلاص ما يحتاي اقول ~ المهم اني يوم اخطف اسلم الحين هههه ، قبل تطبيق النظام المرن عندنا، يوم اخطف اعق السلام وانا خاطفه فالممر ع كل حد هناك لي سمع سمع ولي ما سمع برايه. يعني ما ادري الزبده انه البنت ابد الابدين ما عليها لوم والمفروض ما تبدر وانه عادي مسموحه بحكم الخجل و التربية يعني بالذمه معودينا ان دخلو رياييل هزبونا و دخلن و سيرن وما ادري شوه ههههه، المهم  سواء سلام او غيره ما ادري اي شي وكل شي مسموحات نحن، سبحانه الدنيا اتغيرنا و نتغير وياها الا اشياء وحدود تظل كما هي، ووووووووووو سلامتكم.